سنتے ہیں کہ جانے والے نہیں لوٹتے

عمر بھر، تو کیوں ۔۔۔

!بکھرا ہوا چھوڑ جاتے ہیں

وہ جنکی سانسیں وجہِ ربط تھیں

,بیچ جسم و روح و جاں

اب کون بتلائے کہ انہیں ڈھونڈیں کہاں ۔۔۔

بنا روح کے ہی سفر گزاریں یا ؟؟؟

وہ جسکی انگلی تھام موجوں سے لڑنا تھا

جب وہ ناخدا ہی ساتھ چھوڑ جائے

تو ناؤ کو بیچ منجدھار بچائیں کیوں ؟؟؟

,دھوکہ سا ہوا تھا زندگی کے تھمنے کا

,ساعتیں بڑھتی گئیں لمحہ بہ لمحہ

زندگی چلتی گئی،

لیکن ۔۔۔

دل اس پل میں ہی رک سا گیا

,جب محبتوں میں بچھڑنے کا گماں نہ تھا

,جب زیست کی ڈور موت سے الجھی نہ تھی

,تب ہجر کا صحرا یوں رَہ میں نہ تھا

,رونقیں یوں ماند نہ تھیں

,سانسیں بے جان نہ تھیں

آنکھیں یوں ویران نہ تھیں ۔۔۔

,اے مرے دلِ بے خبر

وہ اک لمحہ مجھ سے چرا لے گیا

,مری زندگی کا عنواں

,مری سانسوں کا پاسدار

,اے مرے دلِ بے خبر”

,کون جانے کہاں روشنی کھو گئی

!لٹ گیا ہے کاروانِ سحر

,جھٹپٹا ہے یہاں رہگزر رہگزر

,وہ تو خوشبو تھا اگلے نگر جا چکا

” !اب کسے ڈھونڈتا ہے ارے بے خبر

روح کا جسم سے جدا ہونا ہر اک کی تقدیر میں رقم ہے ۔۔۔ لیکن یہ جدائی پیچھے رہ جانے والوں کو کبھی توڑ بھی ڈالتی ہے ۔۔۔ اس وجود کی جدائی جس سے محبت اللہ نے شاید ہماری جینز میں رقم کر چھوڑی ہے ۔۔۔ اور پھر وہ وجود جس نے آپ سے دنیا میں سب سے زیادہ بے لوث اور بے ریا محبت کی ہو ۔۔۔ اس کی جدائی آسان نہیں ۔۔۔ دو سال گزر گئے ہیں امی آپ کو گئے ۔۔۔ لیکن ٤ مئی کا وہ دن لمحہ بہ لمحہ، مرے دل میں ہے ۔۔۔ بس اک اطمینان ہے کہ جلد یا بدیر جمع تو وہاں ہی ہونا ہے سب نے ۔۔۔ اللہ مری امی کو جنتِ فردوس میں اعلیٰ مقام عطا کرے اور ان کی مغفرت فرمائے ۔۔۔!

تو مجھ سے آج وعدہِ ضبطِ الم نہ لے ۔۔۔۔۔۔ ان آنسوؤں کا کوئی نہیں اعتبار دیکھ
“بند شکیب توڑ کر آنسو برس پڑے ۔۔۔۔۔ “اپنوں پہ بھی نہیں ہے مجھے اختیار دیکھ